. Сыныптан тыс жұмыстың тақырыбы: Алтын қақпа зияткерлік сайысы
(С.Бегалин “Бала Шоқан”)
Сыныптан тыс жұмыстың мақсаты:
Оқушылардың ана тіліне, төл әдебиетіне деген құрметін арттыру. Сол арқылы патриоттыққа, тапқырлыққа, шығармашылыққа тәрбиелеу. Өз ойын ашық, еркін айтуға, көшбасшылыққа баулу. Танымдық қабілеттерін жетілдіру.
Сыныптан тыс жұмыстың түрі: сайыс
Сыныптан тыс жұмыстың әдісі: ойын, сұрақ-жауап
Сыныптан тыс жұмыстың көрнекілігі: презентация, кітап көрмесі
Сыныптан тыс жұмыстың барысы:
І.Кіріспе
Осы тілде Абай атам жырлаған,
Мұқағали шаққандай ма мұң маған?
Осы тілде «Отан» деген сөз жазып,
Осы тілде бесік жырын тыңдағам.
Иә, балалар ата-баба қанымен жеткен ана тіліміз бен төл әдебиетімізді құрметтеп, оны жетілдіру – біздің басты міндетіміз. Киелі қазақ даласында дара туған жандар да, олардың ерлікпен бірдей істерін дәріптеген қаламгерлер де жеткілікті. Олай болса, бүгінгі сайысымызда сондай тұлғалардың бірі де бірегейі – Шоқан Уәлихановтың өмірін суреттеген Сапарғали Бегалин ағамыздың «Бала Шоқан» әңгімесі бойынша білімімізді саралаймыз.
Ойынның бөлімдері:
1. Табалдырық
2. Тас қақпа
3. Күміс қақпа
4. Алтын қақпа
5. Алтын сандық
Сайысымыздың әділқазы мүшелері:
1.қазақ тілі мен әдебиеті пәні мұғалімі Қайырова Ақгүл Қайырқызы;
2. қазақ тілі мен әдебиеті пәні мұғалімі Габдуллина Ғалия Гимеденқызы;
3. қазақ тілі мен әдебиеті пәні мұғалімі Муратова Индира Жақсығалиқызы.
ІІ.Негізгі бөлім
Үміт күтіп кейінгі ұрпақ – жастардан,
Сенім арту бабалардан басталған, -деп, бүгінгі сайысымызды бастайық.
Табалдырық
Әр санның астына сұрақтар жасырылған. Сұраққа жауап берген оқушылар келесі кезеңге өтеді.
1.“Бала Шоқан” шығармасының авторы кім?
2.Шыңғыс ауылы күзекке келгенде қатты қуанған кім?
3.Шоқан Уәлихановтың шын аты?
4.“Қорықпа, тимейді”, - деп, Шоқан Мысықты кімнен қорғады?
5. Шоқанның әжесі кім?
6.“Біздің ауыл қыстауға көшеді. Сен осында қаласың ғой, енді аман бол!”
Бұл кімнің сөзі?
Тас қақпа
1.“Атеке, әлгі бала бар ғой, өзі шебер. Қараңызшы, мына сиыры аумаған Кәмила жеңгенің қоңыр сиыры емес пе?”
2.Кейін-ақ бармайсың ба, немене, ол бір жаққа кетіп қалар деп пе едің?
3. Шоқанмен бірге үлкен ақ үйге ілесе келген Мысық неліктен әрі қарай аяғын баса алмады?
4.Есікке қарай шегіншектеп қашқан Мысық кімге соқтығысты?
5.Шыңғыс қай елге және кім болып тағайындалды?
6.Күзектегі Шыңғыс үйінің күзетшілері кімдер?
Күміс қақпа
1.“Қолөнерге әуестік – ішкі сезімнің әсері”. Кімнің ойы?
2.Жоқ, бермеймін, кешегі балалардай алып қашасың, - деп, Мысық ойыншықтарын қайда салды?
3.Күзекке келгенде Шоқан мінген құнанның түсі қандай еді?
4.Сары бәйбіше Мысықтың өне бойына қарап шығып нені көрді?
5.Бауырсаққа тойып, қымызды сіміре салған бала босағаға келгенде неге тоқтады?
Алтын қақпа
1.Шоқанның анасынан қорқып, онымен барудан бас тартқан Мысық Шоқанға ненің мүсінін сыйлады?
2.Шыңғыстың қаршығасын ұстап үйге кірген атқосшы кім?
3.“Уәде етпеу керек. Уәде еттің орында”. Шоқан бұл сөзді кімге айтты?
4.Жақыптың мінезі, түр келбеті қандай?
Алтын сандық
Шоқан күзектен кетерде Мысықты үйіне не себепті ертіп келді?
ІІІ.Қорытынды бөлім
Сайыс соңында қазылардың пікірі тыңдалып, жеңімпаз оқушылар марапатталады.
Тілсіз өмір – күнсіз өмір қараңғы,
Айыра алмас жақсы менен жаманды.
Беу, қарағым, тілің үшін күрескін,
Ана тілім әлдилесін ғаламды.
Мынау жаһандану заманында туған тіліміздің туын көкке көтеріп, оның өркендеуіне өз үлесімізді қосайық. .