. . Сағынышым саябақ

Сағынышым тарқамады ешқашан,
Бәлкім аңсау өзімменен кетеді.
Жылдар жылжып, өзгереді, басқа сан,
Өмір солай өтеді...

Жылы сөзді естігім кеп жаутаңдап,
Күнделікті елеңдедім сен жаққа.
Қария боп қалсамдағы қалтаңдап,
Аңсап жетем сол баққа...

Жапырағы желмен тұрар дірілдеп,
Саябаққа қарап көзім тоймады.
Көңіл шіркін көркейеді күлімдеп,
Сүйгенінің айғағы...

Тазалыққа талықсыдым, тартылдым,
Шөлдеп келем, кәусарына қанбадым.
Жайнап тұрған шыршаларда жарқыл мың,
Көлге қарай самғадым...

Жылдар өтті, сағынышым жаңғырған,
Шақырғандай ну орманда арша түп.
Саябағым мәңгі жас боп қалдырған,
Тарта берер аңсатып...
10.09.2013жыл. .