. . Табиғат көзі

Жастық шағым бағым ба еді саялы?
Сол қадалған жанар естен кетпеді.
Балбыраған кезім-керім, аялы,
Жүрегіме жетпей тұрар оттегі...

Табиғаттан сұлулықты іздедім,
Тұрып қалдым көргендей бір дарақтан.
Салтанатты саябақты қыз дедім,
Жалт бұрылтып қаратқан...

Иілген тал күнге қарай талпынған,
Бұлбұл сайрап сезімімен үн қатты.
Неткен ұқсас табиғатпен бар тұлғаң,
Үндестікпен қымбатты...

Жылдар өтті, уақыт артты нар жүгін,
Табиғатым тым тартымды санамда.
Уайымымның ұмытамын барлығын,
Ғашық болып ғаламға...

Табиғаттан таптым барлық сыйымды,
Ғаламаты мәңгілік қой толғанар.
Сезгендей боп әрбір сәтте күйімді,
Демеуші боп елестейді сол жанар...
04.06.2013жыл. .