Меню
Назад » »

Қазақ қызы

загрузка...
Қазақ қызы

Сағынышымсың, көңілге көркем күй қосар,
Лағыл мүсінсің, өмірді өркен гүл жасар.
Қуаныш болып, жан дүниең көрік ашпаса,
Жаңалық әсте кім жасар?!

Табиғатымсың, тартылып мәңгі тұратын,
Жанымды жаулап, жақсылық жырға бұратын.
Әдеміліктен әрленген әсем әлемсің,
Құндылық, қасиет құратын...

Шырайың шексіз, шабытым шырша, шұғыла,
Сұлулық сенде тартылдым күн-түн ұғына.
Өзіңді зерттеп, жүректі өртеп, өтермін,
Шыға алмай биік шыңыңа...

Сүйкімді ару, көруге сені көз керек,
Өлеңмен өрсең өмірің тағы өзгерек.
Сұлуды көрмей, жүйрікке ермей, ел айтар,
Жайылар өсек, тез дерек...

Елдің ертеңі, иман желкені, тұнықсың,
Өмір жалғасы өзіңнен алып, ұлықсың!
Даналығыңмен әлемді әлдилете бер!
Даралығыңа есті құнықсын!!!
20.08.2013жыл.

Қазақ қызы...
Қазақ қызы дидарыңа тартылдым,
Жібек шашың толқын болып тербейді.
Жанарыңда жан жібітер жарқыл мың,
Қиылған қас аққу қанат сермейді.

Жазық маңдай кең даланың төсіндей,
Кірпіктерің көтерілсе көл көрем.
Пәк шырайың жұмбақ болып шешілмей,
Бір көрмесем шөлдер ем...

Жаның шуақ табиғатпен үндескен,
Жырлап өтем шабытымда тыным жоқ.
Сезім лаулап әсемдікті білмес пе ем,
Соншалықты туылмасаң сұлу боп?!

Қазақ қызы нәзік тұлға, нардайсың,
Қасиетті қорғап мәңгі келесің.
Тектілікті ұрпақтарға жалғайсың,
Сақталады сендей әулие, өр есім!

Сен мәңгілік аққу болып қалықта,
Сұлулықтың балғын сыры, пірі боп!
Тектілікті бар әлемге таныт та,
Ер сүйетін қалғын жүрек гүлі боп!!!
28.04.2012жыл.

Қазақ қызы...
Қазақ қызы біліміңмен, биік тұрсың иманмен,
Ғасырлардың сыйысың сен, жанын баба қиғанмен!
Ардақтысың, аяулысың, арың әппақ сақталған,
Жүрегіңмен нәзіксің сен, жасын жанар тыйғанмен...

Жаның қалап әділдікті, қорғап мәңгі отбасын,
Бауырларға қорған болдың жаның сая тапқасын.
Ата ананың абыройын асқар тауға шығардың,
Аллам алда сақтасын!

Қазақ қызы сабырлысың, сенен мәңгі болашақ!
Қазақ қызын ардақтайық мәңгілікті қаласақ!
Адам ата Хауа анадан әлем болып тарасақ,
Сұлулықтың орны төрде, қорған болып, жарасақ.

Байыптысың сабырменен әрбір іске үн қосқан,
Намысыңмен алда жүрсің қиындыққа сынбастан.
Өзін мүлдем ойламайтын перзентіне қорған боп,
Отбасының ұйытқысы, құрметті ана- шын дастан!

Қазақ қызы - имандылық, ар мен ұяттың бұлағы!
Мейірім мен жылы жүрек, шынайылық шырағы!
Қарындасым, қарлығашым ағаңда мол сағыныш,
Сені көрсем сағым болған анам есте тұрады...
27.12.2013жыл.

Қазақ қызы
Құлпырасың гүл көктемгі, табиғатың тартады,
Тұнжырасың сыр өткел-ді, еске салар өткенді.
Жаның бөлек, ақ жауынын күтіп күн-түн жүргендей
Күліп жүрші, өмір ғой бұл, кімдер келіп, кетпеді...

Қазақ қызы тағдырымен күресуші нар тұлға!
Саған тілек, саған үміт жақын жандар артуда.
Өмір өзі басталады жылауымен күреспен,
Алда ақ жол, сірә болмас шегінуге, қайтуға...

Дидарыңа ұқсатамын табиғаттың тартуын,
Сұлулықты сақтау бөлек, сүйкімділік шарты мың!
Тектілігің телміртеді, келбетіңмен келісті,
Қылығыңмен қымбаттысың, қыз-қасиет-жалпы ұғым!

Елік мүсін еліткендей, еріткендей қарасы,
Жазылғандай ер жігіттің жүректегі жарасы.
Барлық уайым кетер ме еді, мұңның жібі сөгіліп,
Күн шыққандай күлімсірей тағы да бір қарашы...

Сұлулықтың сиқыры мол, кереметтің киесі,
Сезім болып өрілесің тартылыс боп жүйесі!
Табиғаттай тартымдысың таңғажайып таңдағы,
Қазақ қызы сен аман бол сүйкімділік иесі!!!
06.02.2014жыл.


Қазақ қызы...

Шуағыңмен төгілесің, сәуле шашып көркіңмен,
Өмір болып берілесің ар намыс боп сертіңмен.
Ерлік болып өрілесің Тұмар болып тағылып,
Ару болып ажарыңмен айырасың еркімнен...

Қазақ қызы тектілікпен, өртті үмітпен өрілдің,
Қасиеті халқымыздың, тірегісің сенімнің.
Сұлулыққа құштар болсақ, ұқсар болсақ ғажапқа,
Негізі сен, теңізі сен - кереметтің, керімнің!

Өмірлерді жалғастырдың, күш бітіріп арды ұлға,
Күліп қана келесің сен қарсы жүзіп тағдырға.
Біліміңмен биіксің сен, иығыңда нар жүгі,
Нәзік қалып, әлем танып, айналғансың ән жырға!

Жұмсақ мінез, елік көрік, жан дүниеңді ашқандай,
Жымиясың ерлік істе, жауқазын боп жасқанбай.
Отбасының ұйытқысы,берекесі, ырысы,
Шаңырақта шаттық бар ма, тек өзіңнен басталмай?!

Табиғаттай көріктісің, елік мүсін заңғар да,
Болашақтың бал бақытын өзге сірә қамдар ма?
Қазақ қызы қымбатсың сен, мәңгілікке жалғанған,
Елім аман, жұртым тыныш, өсіп, өнер сен барда!!!
18.02.2014жыл.
загрузка...
Никто не решился оставить свой комментарий.
Будь-те первым, поделитесь мнением с остальными.
avatar